"Por un mundo onde sexamos socialmente iguais, humanamente diferentes e totalmente libres"

Rosa Luxemburgo

​

 

Feminismo é a loita pola igualdade real entre mulleres e homes. Significa pór "lentes violetas" ao tomar conciencia das desigualdades e facerlles fronte.

​

​​Os feminismos son outro dos grandes piares de SEF. Feminismos en plural, porque a beleza do feminismo está precismente ahí, na súa pluralidade, en camiñar a carón doutras mulleres que aportan os seus propios matices a esta loita común.

​

Como mulleres sentimos máis que nunca a necesidade de ofrecer ao noso alumnado a oportunidade de medrar nun mundo onde exista a igualdade real que defende o feminismo. A necesidade deste piar vén dada por dous factores. O primeiro, o feito de que as nenas e os nenos do segundo ciclo de educación infantil cheguen xa cargadas/os de estereotipos e roles de xénero restritivos. E o segundo, pola necesidade dun cambio social que camiñe cara á igualdade real.

​O feminismo na escola, para nós, significa coeducar para previr desigualdades, estereotipos, invisibilizacións, violencias,...

​

Como docentes, mulleres e nais, queremos non só ofrecer ás nosas alumnas a posibilidade de empoderarse, senón visibilizar o invisible, é dicir, ofrecer a todo o alumnado modelos válidos de referencia, alonxados dos roles hexemónicos tradicionais. 

​

​Aínda estamos nos inicios deste camiño e seguiremos formándonos para enfrontarnos ao difícil reto de despatriarcalizar a educación nas nosas aulas porque, para conseguilo, primeiro temos que deconstruírnos a nós mesmas.